Will die untere Luftschichte zersch no hei müesse duregheizt wärde, hei mir am 12.30h uf der Wängi obe zerscht afe mol Würschtli bröötlet. Der Oli het Geburtstag gha und er het deswäge ar Tankstöu grad e ordentlichi Ladig für alli kouft. Wo me de het chönne gseh, dass die erschte Gleitschirme sich langsam chöi hebe, si mir a Startplatz füre no bitz go plaudere und go parat mache. Sisch schön gsi, so viel bekannti Gsichter z gseh. Zum Wätter passend hani Toplande uf der Tannmatt aagseit, mit einere Stund Ziit zum umeturne ir Luft und aneflüüge. Der Wind isch dört würklich perfekt aagstande und d Geissflueh het vordraa schwach aber kontinuierlich für Stiige gsorgt. Ideal. Nach öppe 10min Ussicht gniesse lande zuesätzlich no der Gröj und der Yvan ine und der Präsi Jufer heizt eus churz drno mit ziemlich genau 120kmh über d Chöpf. E super Show! Sehr beiidruckend. S nöchschte Toplandeziel isch denn der Laupersdörfer Stierebärg gsi. Will das dört so schön fiin gange isch, hei die meischte vo eus das grad mehrmols gmacht und sich drbii vom Heini lo filme. Danach useflüüge und Bierli zische mit vielne Falke am LP Schwängimatt. E super Tag!