S isch richtig schön gfloge hüt. D Prognosene vo de Emagramm hei für hüt einisch nid gstumme, es het nämlich rächt suuber dürezoge - so wies Soaringmeteo voruusgseit het. Der Yves het im Bus gmeint, er würdi richtig Schwarzwald flüüge. Zäme mit em Südweschtwind und de Cirre vor gliiche Richtig het mi das e sehr e gueti Idee dünkt.
Mir si denn via Passwang und Wasserfalle fasch bis zum Bölche gfloge und heit dört richtig Schwarzwald useghebt. Nach ere wiitere Thermik het’s mi und der Phippu gsteckt, will mir knapp der Aschluss ad Thermik nid gha hei. Der Chris, der Koni, der Markus, der Oli und der Thömu si wiiter und höch übers Baselbiet gfloge. S het super Fotene gä und sisch e Gnuss gsi, die grosse und oft regumässige Thermike uuszdräie. Am Schluss lande si „äne am Jordan“ und hei e huere Fröid! Cool, dass es no einisch so guet gange isch vor der Rägephase. Eg freue mi scho ufs nööchschte Mol. Hebet s guet und schaffet viel - de chöit dir denn frei nä, wenns wieder sunnet :)
